Monseigneur, jay esté adverti comme la cavallerie que vous aves mis en garnizon

à Estoille ont prins prisonnier ung nommé Guillaume Reboullet qui est

lung de ceulx que monsieur de Mirabel avoit apposté pour trahir

ce château, ce quil eust exequuté sans les advertissementz que javois de

Crest, daultant que je me fiois en luy pour estre antien catholique

et avoir porté les armes pour le service de sa maiesté. Et pource

quil est la guide et instigateur de ceulx qui viennent faire tant

de volleries en ce mandement vous ferés, monseigneur, ung grand

bien pour le reppoz de ce paouvre peuple den faire despecher le

païs soit par iustice ou aultrement. Car ceulx qui lont prins

ne fault quilz esperent avoir aulcune ranson de luy pour avoir joué

et mangé tout son bien. Les ennemis descendent en bon nombre

et sassemblent à Bourdeaulx. Si japprens quelque aultre chose

de nouveau, je ne fauldray de vous en advertir. A tant je prieray

le Createur vous donner,

monseigneur, en parfaite santé très longue et très heureuze vye. De

Chateaudouble, ce XV mars 1574

Votre très humble et très obeissant serviteur

Railhet

Consultation